Rikthimi i Trumpit në Shtëpinë e Bardhë rrit mundësitë për diplomaci të profilit të lartë me Korenë e Veriut. Gjatë mandatit të tij të parë presidencial, Trump u takua tre herë me Kim Jong un për bisedime mbi programin bërthamor të Veriut. Shumë ekspertë, megjithatë, kanë thënë se një rinisje e shpejtë e takimeve mes Trumpit dhe Kim Jong unit ka pak gjasa të ndodhë, pasi Trumpi fillimisht do të fokusohet në konfliktet në Ukrainë dhe Lindje të Mesme. Mbështetja e Koresë së Veriut për luftën e Rusisë kundër Ukrainës po ashtu përbën një sfidë në përpjekjet për të ringjallur diplomacinë, thanë ekspertët. Gjatë një takimi pesëditor të partisë në pushtet, Partia e Punëtorëve, Kim e quajti SHBA-në “shtetin më reaksionar që e konsideron antikomunizmin si politikën të tij të pandryshueshme shtetërore”. Kim tha se partneriteti i sigurisë mes SHBA-së, Koresë së Jugut dhe Japonisë po zgjerohet në një “bllok ushtarak bërthamor për agresion”. “Ky realitet tregon qartazi se në cilin drejtim duhet të shkojmë, çfarë duhet të bëjmë dhe si duhet të veprojmë”, tha Kim jong un. Agjencia shtetërore e lajmeve, KCNA tha se Kim jong un kishte “qartësuar strategjinë më të ashpër antiamerikane. Kundërveprimi do të nisë në mënyrë agresive” nga Koreja e Veriut për interesat dhe sigurinë e saj afatgjatë kombëtare. Raportimi nuk dha detaje mbi këtë strategji kundër SHBA-së. Por, u tha se Kim ka vendosur që të forcohen aftësitë ushtarake të vendit përmes përparimeve në teknologjinë e mbrojtjes dhe ka kërkuar që të përmirësohet qëndrueshmëria mendore e ushtarëve koreanoveriorë. Takimet e mëhershme mes Trumpit dhe Kimit jo vetëm që u dhanë fund retorikës së ashpër dhe kërcënimeve për shkatërrim, por dy udhëheqësit krijuan edhe lidhje personale. Megjithatë, bisedimet u ndërprenë më 2019 dhe SHBA-ja vendosi sanksione ndaj Veriut. Që atëherë, Koreja e Veriut ka përshpejtuar ritmin e testimit të armëve dhe ka intensifikuar prodhimin e raketave bërthamore për të shënjestruar SHBA-në dhe aleatët e saj. SHBA-ja dhe Koreja e Jugut janë përgjigjur duke zgjeruar stërvitjet e tyre të përbashkëta ushtarake dhe në to është përfshirë edhe Japonia. Veriu i ka parë këto stërvitje si përgatitje për pushtim.