Sekretari amerikan i Shtetit, Antony Blinken, tha se Uashingtoni është ende duke punuar për të parandaluar një luftë të madhe në Lindje të Mesme, dhe i bëri thirrje Izraelit të mbrojë civilët, pasi 22 persona u vranë nga sulmet në qendër të Bejrutit. Blinken foli një ditë pasi sulmet ajrore izraelite shënjestruan dy ndërtesa në Bejrut, njëra prej të cilave u shkatërrua plotësisht. “Ne vazhdojmë të angazhohemi intensivisht për të parandaluar një konflikt më të gjerë në rajon”, u tha Blinken gazetarëve pas një Samiti të Azisë Lindore në Laos, duke shtuar se është “shumë me rëndësi” për Izraelin që të garantojë se civilët janë të mbrojtur gjatë konfliktit. Burimet libaneze thanë se të paktën një figurë e lartë e Hezbollahut është shënjestruar në sulme, të tretat me radhë në Bejrut, që kur Izraeli nisi fushatën në jug të Libanit, muajin e kaluar, kundër milicisë së Hezbollahut, të përkrahur nga Irani. Këto veprime kanë rritur frikën për ndonjë luftë të madhe rajonale. Televizioni Al-Manar i Hezbollahut tha pas sulmeve se tentiva për të vrarë Ëafiq Safanin, një zyrtar të lartë të sigurisë së grupit, ka dështuar. Në raportime thuhej se Safa nuk ka qenë në asnjërën prej ndërtesave të shënjestruara. Safa udhëheq një departament përgjegjës për të punuar me agjencitë e sigurisë së Libanit, kanë thënë burimet.