Presidenti amerikan Donald Trump, përjashtoi mundësinë e vendosjes së trupave amerikane në terren në Ukrainë, por tha se Shtetet e Bashkuara mund të ofrojnë mbështetje ajrore si pjesë e një marrëveshjeje për t'i dhënë fund luftës së Rusisë në vend. Një ditë pasi Trump premtoi garanci sigurie për të ndihmuar në përfundimin e luftës në një samit të jashtëzakonshëm në Shtëpinë e Bardhë, rruga drejt paqes mbetet e pasigurt ndërsa SHBA dhe aleatët u nisën të përcaktonin se çfarë mund të përfshinte mbështetja ushtarake për Ukrainën. "Kur bëhet fjalë për sigurinë, evropianët janë të gatshëm të dërgojnë njerëz në terren. Ne jemi të gatshëm t'i ndihmojmë ata, ndoshta ... nga ajri", tha Trump në një intervistë me programin "Fox & Friends" të Fox Neës. Trump nuk dha më shumë hollësi. Më vonë, në një intervistë me prezantuesin e radios, Mark Levin, Trump e karakterizoi stilin e tij negociues në përpjekjen për t'i dhënë fund luftës si "një instinkt më shumë sesa një proces". Trump po ashtu pranoi se Presidenti rus Vladimir Putin mund të mos dëshirojë të bëjë një marrëveshje, duke thënë: "Do të mësojmë për Presidentin Putin në dy javët e ardhshme". Natyra e ndihmës ushtarake amerikane për Ukrainën pas një marrëveshjeje të mundshme paqeje mbetet e paqartë. Mbështetja ajrore mund të marrë shumë forma, të tilla si sistemet e mbrojtjes nga raketat ose avionët luftarakë që mbrojnë një zonë ndalim-fluturimi. Sekretarja e shtypit e Shtëpisë së Bardhë, Karoline Leavitt, konfirmoi se mbështetja ajrore amerikane ishte "një opsion dhe një mundësi", por, ashtu si Trump, ajo nuk dha asnjë detaj. "Presidenti ka deklaruar përfundimisht se trupat amerikane nuk do të jenë në terren në Ukrainë, por ne sigurisht që mund të ndihmojmë në koordinim dhe ndoshta të ofrojmë mjete të tjera për garanci sigurie për aleatët tanë evropianë", tha ajo në një konferencë për shtyp.