Shtetet e Bashkuara i kanë shkruar Izraelit, duke i dhënë atij 30 ditë kohë për të rritur aksesin e ndihmave humanitare në Gaza përndryshe, vendi hebre rrezikon që të mbetet pa ndihma ushtarake amerikane. Letra, e dërguar të dielën, përbën paralajmërimin më të fortë të njohur dhe të shkruar nga SHBA për aleatin e saj dhe vjen në mes të një ofensive të re izraelite në Gazën veriore që thuhet se ka shkaktuar një numër të madh viktimash civile. Letra thotë se SHBA ka shqetësime të thella për përkeqësimin e situatës humanitare, duke shtuar se Izraeli mohoi ose pengoi gati 90% të lëvizjeve humanitare mes veriut dhe jugut të rripit të gazës, muajin e kaluar. Izraeli po shqyrton letrën, tha një zyrtar izraelit, duke shtuar se vendi "e merr seriozisht këtë çështje" dhe synon "të adresojë shqetësimet e ngritura" me homologët amerikanë. Izraeli ka thënë më parë se ka vënë në shënjestër operativët e Hamasit në veri dhe nuk ndalon hyrjen e ndihmave humanitare. Të hënën, organi ushtarak izraelit përgjegjës për menaxhimin e kalimeve në Gaza, Cogat, tha se 30 kamionë që transportonin ndihma nga Programi Botëror i Ushqimit kishin hyrë në Gazën veriore përmes kalimit Erez.