Policia financiare ka vënë në pranga një shqiptar, i cili u kap duke transportuar 63 kilogramë marijuanë të fshehur brenda disa sferave të kuqe, një mënyrë shpërndarje që po përhapet shumë midis trafikantëve shqiptarë. Referuar mediave italiane, policia financiare gjatë një inspektimi në një bar në zonën e Sesto San Giovanni ka evidentuar një person i cili ishte duke u futur në scooter i veshur me pallto dimri. Ka qenë pikërisht veshja e pazakontë me pallto, në mes të nxehtësisë përvëluese të korrikut, e cila i ka bërë efektivët e policisë të dyshojnë. Këta të fundit i kanë bërë thirrje personit të ndalojë dhe të afrohet, por menjëherë pasi dëgjoi zërin e efektivëve, shqiptari braktisi scotterin dhe vrapoi për t’i shpëtuar policisë. Vetëm pak minuta më pas, teksa tentonte të futej në garazh, shqiptari është përballur me policinë financiare, e cila pas kontrollit në xhepa i gjeti 215 gramë marjuanë dhe 2 gramë kokainë si dhe pultin e garazhit ku po tentonte të futej shpërndarësi i drogës. Në garazh u gjet një tjetër scooter dhe një makinë e parkuar. Brenda makinës ishin fshehur plot 63 kilogramë marijuanë brenda disa sferave të kuqe. Kjo nuk është hera e parë që policia italiane evidenton këtë mënyrë shpërndarje droge. Në 18 qershor në Triuggio, mbi 60 kg hashash ishin gjetur të fshehur anë sfera në një apartament. Në fillim të korrikut një rast i ngjashëm ishte kapur në një kuti në Natta në Milano.