Saga e vrasjeve që po trondit Shkodrën ka nxjerrë në skenë sërish një emër të njohur të botës së krimit, i cili edhe pse në kërkim nga policia, vazhdon të jetë pjesë e atentateve mafioze. Vrasjen e Endri Mustafës, policia ia ngarkoi Ibrahim Licit, i cili rezultonte në kërkim edhe për disa vrasje të tjera. Tronditës është fakti se në vrasje, sipas policisë, rezulton i përfshirë edhe një 15 vjeçar. Policia njoftoi se ka arrestuar shtetasin e mitur me inicialet E. M. i cili dyshohet se në bashkëpunim me Licin kanë vrarë me armë zjarri Endri Mustafën. Po kush është Ibrahim Lici? Ibrahim Lici është djali i ish-këshilltarit të Bashkisë së Shkodrës, Mustafa Lici. Së fundmi ai ka qenë edhe subjekt i strukturës Forca e Ligjit, ndërsa rezulton në kërkim për disa vrasje të bujshme. Sipas policisë, Lici është autori kryesor i atentatit ndaj vëllezërve Astrit dhe Brahim Bilali, ngjarje kjo e ndodhur në datën 30 mars të 2019. Ata u ekzekutuan në portën e shtëpisë me breshëri kallashnikovi dhe ngjarja u hetua si përplasje mes bandave rivale në Shkodër. Astrit Bilali i cili mbetur i vdekur së bashku me të vëllanë e tij me 30 mars të këtij viti, është babai i Astmer Bilali, ish kampionit boksit i arrestuar si pjesë e grupit "Bajri" në Shkodër. Astriti ishte biznesmen i njohur në Shkodër dhe në qytet ai identifikohej për pasionin e tij për kuajt së bashku me vëllain Brahimin, i cili ishte kryetar i shoqatës “2 prilli”. Viktima Endri Mustafa ka qenë shok me Astmer Bilalin, ndërsa emrat e tyre dalin bashkë në disa ngjarje kriminale. Krimi është vijim i përplasjeve mes dy grupeve Lici dhe Bajri në Shkodër, përplasje që ka regjistruar disa viktima.