Presidenti serb Aleksandar Vuçiç po përgatitet t'i japë kompanisë Rio Tinto, dritën e gjelbër për zhvillimin e minierës më të madhe të litiumit në Europë, dy vjet pasi Beogradi e anuloi projektin, shkroi të dielën Financial Times. Financial Times raporton se Presidenti Vuçiç thotë "garancitë e reja" nga gjiganti global i minierave dhe Bashkimi Europian, duken të mjaftueshme për të trajtuar shqetësimet e Serbisë nëse standardet e nevojshme mjedisore do të përmbushen në luginën e Jadarit, në perëndim të vendit. Kompania Rio Tinto tha në një deklaratë dërguar agjencisë së lajmeve Reuters përmes postës elektronike se “beson që Projekti Jadar ka potencialin të jetë një pasuri e klasit botëror që mund të shërbejë si një katalizator për zhvillimin e një zinxhirit të pjesëve të vlefshme të makinave elektrike në Serbi".