Top News – Serbia voton më 17 dhjetor / Vuçiç shpërndan parlamentin, zgjedhje parlamentare e lokale

Presidenti i Serbisë, Aleksandar Vuçiç, dhe kryetari i Parlamentit të Serbisë, Vladimir Orliç, njoftuan të mërkurën për shpalljen e zgjedhjeve të jashtëzakonshme parlamentare dhe zgjedhjet lokale në disa qytete dhe komuna, përfshirë në kryeqytetin serb, Beograd. Zgjedhjet do të mbahen më 17 dhjetor 2023. Me shpalljen e zgjedhjeve, Vuçiç ka shpërndarë Parlamentin serb që u zgjodh më 3 prill 2022. Paraprakisht, në Parlamentin serb kryeparlamentari, Vladimir Orliç, njoftoi se do të mbahen zgjedhjet për asambletë lokale në 65 qytete dhe komuna. Gjatë një fjalimi të shkurtër, Vuçiç u uroi qytetarëve “zgjedhje të mbara". Ai tha se “vendi po jetojn në kohë të vështira për gjithë botën, në kohën e ndryshimeve globale, në të cilën është e nevojshme që të gjithë të jenë të bashkuar për të luftuar për ruajtjen e interesave kombëtare dhe shtetërore”.