Kompanitë serbe janë duke eksportuar mallra me dypërdorime në Rusi, të cilat janë nën sanksionet e perëndimit për shkak se përdoren në armatimin rus në Ukrainë, pavarësisht premtimit të presidentit serb, Aleksandar Vuçiç, se vendi i tij nuk do të anashkalojë sanksionet e Shteteve të Bashkuara të Amerikës dhe Bashkimit Evropian. Mallrat dypërdorimshe mund të përdoren si për qëllime ushtarake, ashtu edhe për qëllime civile. Mes kompanive që kanë marrë mallra të tilla nga serbia, në Rusi, është edhe furnizuesi i Teknologjisë Informative i cili u godit nga sanksionet amerikane në shtator. Kjo u shpjegua nga Uashingtoni si një përpjekje për të privuar presidentin e Rusisë, Vladimir Putin, nga “pajisjet, teknologjia dhe shërbimet për të cilat ai ka nevojë për të kryer luftën e tij barbare në Ukrainë”. Të dhënat doganore nga baza e të dhënave e tregtisë ndërkombëtare, të analizuara nga REL-i, tregojnë se kompanitë serbe kanë dërguar mallra të sanksionuara me dy përdorime në Rusi në vlerë prej 71.1 dollarësh që kur Putin nisi pushtimin e plotë të Ukrainës në shkurt 2022. Dërgesat e analizuara nga reporterët përfshijnë pajisje elektronike dhe pajisje të tjera të kategorizuara si të “prioritetit të lartë” nga Shtetet e Bashkuara dhe Bashkimi Evropian, për shkak të përdorimit të tyre në armatimin rus që është gjetur në fushëbetejat ukrainase.