Deputetët e Kuvendit të Serbisë miratuan Ligjin për buxhetin e vitit 2024, që do të jetë rreth 17.5 miliardë euro. E prej këtij buxheti, qeveria e serbisë ka planifikuar të ndajë rreth 11 milionë euro më shumë për kosovën, krahasuar me 2023-shin. Funksionimi i institucioneve dhe organizatave, Zyra e Qeverisë, informimi i serbëve në Kosovë, janë vetëm disa nga pikat, për të cilat do të rritet buxheti në vitin 2024. Sic vëren radio Evropa e Lirë, buxheti për kosovën ka ardhur vazhdimisht në rritje dhe ekspertët paralajmërojnë se këto investime kanë qenë jotransparente me vite të tëra dhe është pothuajse e pamundur të përcaktohet shpenzimi total për Kosovën. Kosova shpalli pavarësinë në vitin 2008, të cilën Serbia nuk e njeh. Serbia për gjithë ato vite nuk e ka ndalur financimin e institucioneve paralele, të cilat Prishtina nuk i njeh. Në buxhetin e serbisë, ka shuma të dedikuara për punën e institucioneve paralele në Kosovë, përmirësimin e jetës së qytetarëve, informimin, por edhe për mbështje për klerikët dhe murgjit në Kosovë. Po ashtu, mbështetet edhe puna e Universitetit të Prishtinës me seli në Mitrovicën e Veriut dhe investohet në projekte mjedisore. Disa ekspertë mendojnë se me buxhetin për kosovën blihet mbështetja politike e serbëve që jetojnë atje. Një numër i madh njerëzish në veri marrin paga bazuar mbi kontrata të ndryshme, e shpesh edhe pa kontrata fare.