Prokuroria e Tiranës ka vendosur masën e sekuestros nga të gjitha pasurive të një spitali privat në Tiranë, pasi gjatë një hetimi disamujor janë gjetur një milionë euro fatura fiktive. Hetimet ndaj spitalit International Medicare SHPK kanë nisur në vitin 2024 pas denoncimit të një shtetasi portugez. Portugezi pagoi një shumë prej 5200 eurosh për marrjen e tre shërbimeve nga ky spital por doktorët që do të kryenin ndërhyrjet u larguan nga institucioni. Pas disa anulimeve, ai kërkoi kthimin e shumës së parave por pa sukses. Kallëzuesi deklaroi se u mashtrua nga ky spital pasi i morën paratë dhe nuk i ofruan shërbimin duke përdorur justifikime të ndryshme. Nisur nga ky kallëzim, prokuroria thotë se hetimet që pasuan provuan se spitali operonte me mandate dore dhe jo me kupona tatimorë. Gjatë kontrollit u gjetën 1 milionë euro fatura jo tatimore, të padeklaruara, ndërsa dyshohet se si mjekë punonin persona kryesisht shtetas turq, të palicencuar si mjekë në vendin tonë. Prokuroria thotë se ka dyshime të arsyeshme se nga spitali, International Medicare shpk, është vepruar në kundërshtim me ligjin duke fshehur të ardhurat e përfituara nga pacientët.