Kur u betua si drejtor i ri i përgjithshëm i Policisë së Shtetit, Skënder Hita premtoi luftë krimit dhe korrupsionit edhe në radhët e uniformave blu. Tre ditë më vonë, kryepolici ka firmosur urdhrin e pezullimit për shtatë kolegë të tij, mes të cilëve dy shefat e komisariateve Peqin dhe Devoll. Të pezulluarit dyshohen se me veprimet dhe mosveprimet e tyre kanë lejuar kultivimin e hashashit në magazinën në pronësi të të vëllait të drejtorit të burgut të Rrogozhinës, e zbuluar në fshatin Kurtaj të Peqinit, në datën 19 shkurt. Për këtë rast, drejtori Hita ka pezulluar nga detyra shefin e komisariatit të Policisë në Peqin, Altin Gusho dhe Bilbil Litan, ish shefi komisariati po në këtë qytet, por që aktualisht drejtonte komisariatin e Devollit. Të pezulluarit e tjerë janë Danjel Kaçaniku, me detyrë shef i krimeve në volum në Peqin, Sefer Dushku, me detyrë specialist i policisë kriminale në Peqin, Muharrem Zylyfi, me detyrë specialist i policimit në komunitet në Peqin, Denis Sinani, ish-shef i Krimeve në Volum në Komisariatin e Policisë Peqin, aktualisht me detyrë Shef i Krimeve në Volum në Komisariatin e Policisë Devoll dhe Arbeni Koseni, ish-agjent në Peqin, aktualisht me detyrë trupë shërbimi në Njësinë e Pritjes dhe Sigurisë në Gjadër. Ndaj këtyre personave, Drejtoria e Standardeve Profesionale filloi hetim disiplinor për “Moszbatim haptazi të dispozitave ligjore për përmbushjen e detyrave funksionale”.