Gjykata e Posaçme ka pranuar kërkesën e prokurorisë për vendosjen e sekuestros preventive për asetet e kompanisë “5D” dhe të gjashtë pasurive të tjera të lidhura me ish-zyrtarët e Bashkisë së Tiranës të akuzuar në këtë dosje për korrupsion me tenderat. Përveç kompanisë ‘5D’ nën sekuestro janë vendosur dy pasuri truall me sipërfaqe 500 dhe 50 metër katrorë me vendndodhje në rrugën Tefta Tashko në Tiranë, regjistruar në emër të Selim dhe Olga Mollës, familjarë të Redian Mollës, ish-drejtori i ujësjellësit të Tiranës. Është sekuestruar gjithashtu edhe shoqëria tregtare ‘Restur’ në pronësi të vetë Redian Mollës dhe 24 për qind të aksioneve të ish-drejtorit të UKT-së në një shoqëri ndërtimi me seli në Durrës. Sekuestro është miratuar për dy apartamente me sipërfaqe 123 dhe 84 metër katrorë dhe dy garazhe me sipërfaqe totale 84 metër katrorë, në pronësi të Sonila Qatos, e afërmeve e Mariglen Qatos, ish drejtor i Inspektoriatit të Mbrojtjes së Territorit në Bashkinë e Tiranës. SPAK thotë se pasuritë e sekuestruara mund të jenë objekt konfiskimi, pasi dyshohet se janë produkte të veprës penale për të cilat akuzohen ish-drejtorët e Bashkisë së Tiranës.