Kancelarit Olaf Scholz iu deshën orë të gjata bisedimesh për të arritur një marrëveshje me 16 drejtuesit e landeve gjermane për çështjen e azilkërkuesve. Bisedimet që nisën paraditen e së hënës u mbyllën rreth orës 3 pas mesnate. Në përfundim, kancelari Scholz tha se është një "moment historik”, duke shtuar se të gjithë ishin dakord për masat që duhen ndërmarrë. "Qëllimi ynë i përbashkët është të largojmë emigracionin ilegal”. Opozita e cilësoi një hap të mirë në drejtimin e duhur, por jo historik. Sipas marrëveshjes, qeveria federale të ndajë për çdo azilant 7.500 euro në vit. Mes palëve ende nuk është arritur marrëveshje që procedurat e azilit të kryhen eventualisht në vendet e treta. Kjo çështje do të shqyrtohet në nje moment të dytë. Kancelari tha se për këtë kërkohet edhe dakordimi i vendeve të treta, që eventualisht do të pranonin që procedurat të kryhen në këto vende, e kjo nuk është aq e lehtë.