Studentët e disa universiteteve në Tiranë kanë bojkotuar më 14 tetor procesin mësimor, duke iu bashkuar protestave që nisën një ditë më parë në kryeqytet. Një nga problemet kryesore të artikuluara në protestë është kostoja e lartë e jetesës në Tiranë. Qiraja mesatare e një apartamenti ka arritur në rreth 720 euro në muaj, duke përthithur pothuajse të gjithë pagën mesatare neto. Për studentët që jetojnë larg familjeve, kjo e bën të vështirë përballimin e strehimit, ushqimit dhe shpenzimeve të tjera të përditshme. Edhe çmimet e ushqimeve po rëndojnë buxhetet e familjeve dhe të rinjve. Në Shqipëri, ushqimet kushtojnë tashmë më shumë se mesatarja e Bashkimit Europian, ndërsa të ardhurat e qytetarëve janë shumë më të ulëta. Për më tepër, çmimet e ushqimeve në vend po rriten më shpejt se në shumicën e vendeve europiane.