Hungaria ka hequr dorë nga kundërshtimi i kandidaturë së Mark Ruttes si sekretari i ardhshëm i përgjithshëm i NATO-s, njoftuan mediat holandeze të martën, pasi kryeministri holandez në largim dhe homologu i tij hungarez u takuan në margjinat e një takimi të liderëve të BE-së në Bruksel. Duke cituar burime të afërta, mediat holandeze raportuan se kryeministri hungarez Viktor Orban nuk e përsëriti kërkesën e tij për një kërkim falje nga Rutte për ato që Orban i përshkroi muajin e kaluar si opinione "problematike" për Hungarinë. Kërkimi i faljes ishte një nga dy kushtet që Hungaria kishte paraqitur për miratimin e Ruttes si pasardhësin e Jens Stoltenberg në krye të NATO-s. Kushti tjetër ishte garancia që Hungaria nuk do të duhej të siguronte fonde për Ukrainën ose të dërgonte personel në vendin e përfshirë në luftë, dhe ky kusht, sipas zyrtarëve, u përmbush javën e kaluar nga Stoltenberg. Shtetet e Bashkuara, Britania, Franca dhe Gjermania kanë mbështetur kandidaturën e Ruttes për të pasuar Stoltenbergun, i cili do të largohet në tetor nga posti i kreut të NATO-s. Turqia u tha aleatëve të saj në prill se do të mbështeste gjithashtu Rutten. Tani vetëm Rumania dhe Sllovakia nuk kanë dhënë ende dritën jeshile. NATO i merr vendimet me konsensus, kështu që çdo kandidat ka nevojë për mbështetjen e të 32 aleatëve. Presidenti rumun Klaus Iohannis tha në mars se ai do të kandidonte për postin e lartë të NATO-s, duke argumentuar se shtetet e Evropës Lindore kanë nevojë për përfaqësim më të mirë në rolet udhëheqëse euro-atlantike.