Presidenti francez Emmanuel Macron tha të premten se uniteti midis Evropës dhe Shteteve të Bashkuara ishte çelësi në mbështetjen e Ukrainës, duke shtuar se nuk ka "mosbesim". "Uniteti mes amerikanëve dhe evropianëve për çështjen ukrainase është thelbësor. Dhe e them vazhdimisht, ne duhet të punojmë së bashku", u tha Macron gazetarëve gjatë një vizite në Kinë. "Ne mirëpresim dhe mbështesim përpjekjet për paqe që po bëhen nga Shtetet e Bashkuara të Amerikës. Shtetet e Bashkuara të Amerikës kanë nevojë për evropianët që të udhëheqin këto përpjekje për paqe", shtoi ai. Revista gjermane Spiegel citoi të enjten një transkript të një telefonate konfidenciale që tregon se Presidenti francez dhe Kancelari gjerman kanë shprehur skepticizëm në lidhje me përpjekjet e qeverisë amerikane dhe të dërguarve të saj për të negociuar paqen mes Ukrainës dhe Rusisë. Sipas gjermanes Der Spiegel, Macron kishte shprehur frikën se Uashingtoni mund të tradhëtonte Ukrainën. “Unë mohoj gjithçka”, tha Macron, kur u pyet për raportin e der Spiegel. “Ne kemi nevojë për Shtetet e Bashkuara për paqe. Shtetet e Bashkuara kanë nevojë për ne që kjo paqe të jetë e qëndrueshme dhe e fortë”, tha ai. “Pra, nuk ka një skenar ku një paqe e qëndrueshme në Ukrainë arrihet pa përpjekje të përbashkëta mes evropianëve, amerikanëve, kanadezëve, australianëve dhe japonezëve”, tha Macron.