Viti 2025 konfirmon statusin e tij si një vit rekord për pasurinë globale: më të pasurit e botës zotërojnë 15.8 trilionë dollarë, të nxitur nga tregjet e aksioneve në lulëzim dhe rritja marramendëse e gjigantëve të teknologjisë. Kjo është panorama e marrë nga UBS (u-bi-es), me 196 miliarderë që e kanë ngritur vetë perandorinë e tyre, numri më i lartë që nga viti 2021. Shtetet e Bashkuara vazhdojnë të jenë "shtëpia e miliarderëve" me 924 individë, e barabartë kjo shifër me një të tretën e të gjithë super të pasurve në botë. Është vendi ku krijohet pasuria dhe madje shpejt. 89 miliarderët e rinj të regjistruar nga UBS, në fakt, vijnë kryesisht nga bota e startup-eve dhe investimeve në kompani që simbolizojnë epokën e Inteligjencës Artificiale: Nvidia, Oracle dhe gjigantë të tjerë të teknologjisë që kanë parë performancë të shkëlqyer në vitet e fundit. Në Evropë, miliarderët e rinj lindin në familje. Skenari është i ndryshëm në Evropën Perëndimore, ku miliarderët e rinj nuk e ndërtojnë pasurinë e tyre, por trashëgojnë pasuri tashmë të konsoliduara. Sipas UBS, 91 persona u bënë miliarderë falë trashëgimive që arrijnë në total 297.8 miliardë dollarë, një rritje prej 36% krahasuar me vitin e kaluar. Pothuajse dy të tretat e kësaj pasurie të transferuar janë të përqendruara në Evropën Perëndimore, ndërsa Shtetet e Bashkuara zënë 86.5 miliardë dollarë. E ndërkohë, e ardhmja parashikohet akoma më e ndritur. 6.9 trilionë dollarë do të ndryshojnë duar deri në vitin 2040. Dekada e ardhshme do të jetë dekada e trashëgimive të mëdha. UBS parashikon që deri në vitin 2040, miliarderët do t'u kalojnë 6.9 trilionë dollarë trashëgimtarëve të tyre.