Rusia ka nisur propagandën për ngritjen e moralit të pilotëve të saj në rast të përballjes në Ukrainë me avionët amerikanë, F-16. Agjencia ruse e lajmeve, TASS publikoi një intervistë me një pilot rus të avionëve SU-35. "Ekipi ynë është plotësisht i përgatitur për të përballuar sfidën e F-16". Piloti shpjegon më tej se ata kanë analizuar me kujdes aftësitë dhe dobësitë e F-16. Sipas pilotit, të identifikuar vetëm me emrin Aleksandër, Su-35 tejkalon F-16 amerikan me veçori të avancuara, duke përfshirë rreze superiore radari dhe aftësi raketash me rreze më të gjatë. Gjithashtu, Ministria ruse e Mbrojtjes theksoi se avionët SU-35 patrullojnë vazhdimisht në Balltik, në mbrojtje të hapësirës ajrore ruse dhe ruajtjen e vigjilencës në nivele të larta. Su-35 është një prej armëve me të cilat krenohet më shumë Vladimir Putin. Ai është i aftë të lëshojë raketa dhe godasë shënjestrën nga distanca të mëdha, si dhe të tejkalojë sistemet kundërajrore.