Vendimi i Lituanisë për të limituar tranzitin e mallrave ruse në rajonin e Kaliningradit ka sjellë tensione të paprecedenta në rajon. Rusia ka kërcënuar Lituaninë se do të përballet me pasoja që do të ndikojnë negativisht në popullsinë e vendit, nëse nuk lejonte lëvizjen e mallrave që kalojnë tranzit nga shteti baltik në enklavën ruse të Kaliningradit. Zëdhënësi i Kremlinit, Dmitry Peskov tha se kjo është një lëvizje e paligjshme dhe e paprecedentë, e cila sipas tij, vjen si pasojë e presionit të Bashkimit Europian. Ai thotë se Rusia do t’i përgjigjet veprimeve të tilla armiqësore dhe se pasojat e tyre do të kenë një ndikim serioz negativ në popullatën e Lituanisë, një vend anëtar i NATO. Por vendimi i Lituanisë për të kufizuar transitin e mallrave në rajonin e Kaliningradit, si pjesë e sanksioneve ndaj Rusisë, ka izoluar atë territor që prej viti 1945 dhe përfaqëson atë që qarqet ushtarake perëndimore e quajnë “aeroplanmbajtësen më të rrezikshme të ushtrisë ruse”. Përballja e Kremlinit me Ukrainën mund të shndërrohet në një përballje të frikshme me dimensione shumë më të gjera, i shkaktuar potencialisht nga tensioni gjithmonë më i lartë në enklavën ruse të Kaliningradit.