Donald Trump po shqyrton urdhërimin e trupave amerikane për të pushtuar ose bllokuar ishullin Kharg të Iranit, por rrezikon "dëme të pakthyeshme" për ekonominë globale nëse ai e ndërmerr me këtë veprim. Katër burime me njohuri për çështjen i thanë Axios se Shtëpia e Bardhë po diskuton planet për të pushtuar ose bllokuar ishullin, i cili është aseti më i rëndësishëm ekonomik i Teheranit dhe pika e nisjes së 90 përqind të eksporteve të tij të naftës. Në fund të javës së kaluar, Amerika njoftoi vendosjen e 5,000 marinsave si edhe të USS Tripoli, një anije sulmi amfibe, në Lindjen e Mesme, duke sinjalizuar mundësinë e një operacioni tokësor. Pentagoni ka bërë të ditur se trupat mbërrijnë brenda dy ditësh në rajon. Presidenti amerikan do ta shënjestrojë ishullin me qëllim që të shkatërrojë të ardhurat e Iranit nga nafta. Ai gjithashtu mund ta përdorë bllokimin e ishullit Kharg si një monedhë negociuese, duke ndalur fitimet e regjimit nga nafta për ta detyruar atë të rihapë Ngushticën jetësore të Hormuzit, përmes së cilës rrjedh 20 përqind e naftës dhe gazit natyror të lëngshëm në botë. Por shkatërrimi i infrastrukturës së tij të naftës do të shkaktonte "dëme të pakthyeshme për ekonominë iraniane dhe ekonominë globale", paralajmërojnë ekspertët.