Policia e Pogradecit ka vënë në pranga këtë të hënë shtetasin Artur Musollari, duke parandaluar një ngjarje të mundshme kriminale kundër personit, pasi 49-vjeçari u kap në qytet, me armë zjarri pistoletë, me fishek në fole, gati për qitje. Arrestimi i 49-vjeçarit u bë në kuadër të operacionit "Ndërhyrja", falë informacioneve të marra dhe ndërhyrjes së shpejtë të Policisë. Artur Musollari rezulton i dënuar më parë për armëmbajtje pa leje. Gjatë operacionit, në lagjen nr. 1, Pogradec, shërbimet e Policisë kanë lokalizuar 49-vjeçarin dhe gjatë kontrollit të ushtruar në çantën e tij, kanë gjetur një armë zjarri tip pistoletë me fishek në fole, gati për qitje, e cila u sekuestrua në cilësinë e provës materiale. Në vijim të veprimeve procedurale, gjatë të kontrollit ushtruar në automjetin dhe në banesën e këtij shtetasi, u gjetën sasi parash në valuta të ndryshme, një shkop bejsbolli, një palë dylbi dhe një aparat celular.