Efektivët e Forcave Speciale, ato Komando, zhytësit e Forcës Detare, skuadrat e kërkim - shpëtimit, specialistët e Mbrojtjes nga Armët e Dëmtimit në Masë, Policia Ushtarake, e deri te mjekët dhe infermierët që shërbejnë në uniformë do të marrin një shtesë të re mbi pagën, bazuar në vendimin e fundit të qeverisë për rritjen e trajtimit financiar për Forcat e Armatosura. Kështu efektivët e Forcave Speciale do të kenë trajtim financiar shtesë që shkon deri në 40000 lekë në muaj; ndërsa ato Komando 30000 lekë në muaj; Ndër këto kategori janë edhe efektivët e kërkim – shpëtimit, të cilët do të marrin deri në 30000 lekë në muaj shtesë mbi pagën; një shtesë prej 25000 lekësh do të përfitojnë edhe efektivët Asgjësimit të Mjeteve Shpërthyese, ata të Mbrojtjes nga armët e dëmtimit në masë si dhe Policisë Ushtarake. Një kategori e veçantë që përfitojnë janë edhe mjekët e infermierët që shërbejnë në Forcat e Armatosura. Për mjekët është përcaktuar që të kenë një trajtim financiar shtesë deri në 25000 lekë në muaj, ndërsa për infermierët deri në 18000 lekë shtesë mbi psagën. Përmirësimi i ndjeshëm i trajtimit financiar, sipas Ministrisë së Mbrojtjes, do të rrisë jo vetëm motivimin e efektivëve aktualë, por do të shërbejë edhe si një nxitje për të gjithë të rinjtë për t'u bërë pjesë e Forcave të Armatosura, të cilat ofrojnë karrierë dinjitoze dhe të ardhura përherë e më të mira.