Rritja e pagave në administratën publike dhe aksioni për deklarimin real të pagave të punonjësve në sektorin privat; po japin ndikimin e tyre në nivelin e tatimeve të arkëtuara në buxhetin e shtetit nga administrata tatimore. Në gjashtë muajt e parë të këtij viti ka pasur një tejkalim plani sa i takon të ardhurave nga tatimi mbi fitimin, tatimi mbi të ardhurat personale, taksat nacionale dhe TVSH neto në vend, të cilat arritën nivelin e rreth 129 miliardë lekëve, pra 14.7 për qind më shumë krahasuar me një vit më parë, ose 2.2 për qind më shumë se plani paraprak. Po ashtu edhe të ardhurat nga sigurimet shoqërore dhe shëndetësore janë rritur ndjeshëm. Nga janari deri në qershor të këtij viti u arkëtuan 87.6 miliardë lekë nga sigurimet duke u rritur me 12.5 për qind krahasuar me një vit më parë. Shpenzimet e përgjithshme publike, në 6 muaj arritën në rreth 332 miliardë lekë. Në terma vjetorë, shpenzimet e përgjithshme u realizuan në masën 40 për qind të planit vjetor. Duke qënë se të ardhurat totale të arkëtuara kanë rezultuar më të larta sesa shpenzimet, bilanci ka rezultuar me suficit në nivelin e rreth 33.5 miliardë lekë.