Presidenti i Azerbajxhanit Ilham Aliyev i ka kërkuar Rusisë të marrë përsipër fajin për avionin që u rrëzua këtë javë, pasi sipas tij, pas kësaj tragjedie fshihet Moska zyrtare. Një ditë më parë presidenti i Rusisë Vladimir Putin kërkoi falje për rrëzimin, por nuk pranoi në asnjë moment se ai ishte goditur nga një sulm rus. Sipas agjencisë shtetërore të lajmeve, Azertag, Aliyev është shprehur se ka fakte se avioni civil i Azerbajxhanit u dëmtua nga jashtë mbi territorin rus, pranë qytetit të Groznit. “Ne e dimë gjithashtu se sistemet e luftës elektronike e nxjerrin avionin tonë jashtë kontrollit”, tha ai, duke shtuar se “në të njëjtën kohë, si pasojë e zjarrit nga toka, edhe bishti i avionit është dëmtuar rëndë”. Që kur avioni u rrëzua para disa ditësh kanë qarkulluar lajme se Rusia e rrëzoi aksidentalisht avionin, megjithëse ende nuk ka një raport përfundimtar. Avioni me pasagjerë i Azerbaijan Airlines po fluturonte nga Bakuja e Azerbajxhanit drejt Groznit në Rusi më 25 dhjetor, kur ndryshoi rrugën dhe u rrëzua në Kazakistan, duke lënë të vrarë 38 nga 67 personat që ishin në bord.