Ish-kryeprokurori i Përgjithshëm, Adriatik Llalla i dënuar me dy vite burg për fshehje pasurie, është shfaqur pas disa vitesh. Ka qenë kryetari I Ballit Kombëtar, Adriatik Alimadhi ai që ka postuar në Facebook dy foto me Llallën, ku në njërën prej tyre shfaqen dhe duke bërë shqiponjën me duar. “Një takim pas disa vitesh me ish-Prokurorin e Përgjithshëm të Shqipërisë mikun e familjes tonë Adriatik Llalla”, shkroi Alimadhi. Llalla, sipas avokatit mbrojtës Sokol Hazizaj, ka fituar azil politik në Itali. Deklaratë kjo e bërë prej tij në shkurt të vitit 2023. Por nga ana tjetër SPAK gjatë kësaj kohe ka nënvizuar se se procesi i ekstradimit për ish-kryeprokurorin është ende në vazhdim në Itali dhe se nuk ka asnjë refuzom kërkese nga ana e autoriteteve italiane. Ish-kreu i Prokurorisë së Përgjithshme, Adriatik Llalla u dënua me dy vjet burg për fshehje pasurie në shtator të vitit 2021, por vendimi nuk u ekzekutua asnjëherë pasi Llalla u largua nga vendi drejt Italisë. Ai u shpall fajtor nga GJKKO për mosdeklarim dhe fshehje pasurie në 3 episode. Nga hetimet rezultoi se Llalla nuk ka deklaruar një shumë prej rreth 7 mijë dollarësh për lindjen e djalit, shpenzimet që lidhen me ndërtimin e katit të tretë të një banese si dhe të ardhurat për shkollimin e vajzës në Gjermani. Në përfundim të gjykimit në shkallët e tjera është vendosur konfiskimi i pasurisë së tij, një apartament në Durrës dhe rreth 22 mijë m2 tokë arë ne periferi të Tiranës. Llalla u arrestua në dhjetor të vitit 2021 në Romë, por më pas për shkak të gjendjes së tij shëndetësore u lirua me kushtin që do të mbahej në survejim nga autoritetet italiane.