Stoku i depozitave që individët, bizneset, institucionet shtetërore dhe organizatat e tjera kanë në banka shënoi një tjetër rënie në mars për të dytin muaj radhazi. Kursimet totale që ndodhen në sistemin bankar u tkurrën me gati 100 milionë euro. Si depozitat në monedhën vendase ashtu dhe ato në valutë kishin tendencë rënëse. Kursimet në lekë ishin 549 miliardë lekë. Kursimet pa afat të individëve janë ato që shënuan rënien më të fortë nga depozitat në lekë. Zhvlerësimi i Euros ka tkurrur më shumë depozitat në valutë. Nga të dhënat e Bankës së Shqipërisë, në mars të këtij viti euro ka zbritur në 114 lekë, nga rreth 122 lekë që ishte në të njëjtën periudhë të një viti më parë. Sipas të dhënave të Bankës së Shqipërisë, tkurrja është me rreth 90 milionë euro në total. Megjithatë, depozitat në euro dhe dollar mbeten edhe për muajin shkurt më të preferuarat, duke zënë 56 për qind të totalit të tyre.