Kryeministri Edi Rama do të mbajë në orën 19:00 një fjalim për fitoren në zgjedhjet e 11 majit, në një tubim madhështor në sheshin “Skënderbej”. Në një mesazh në Facebook, Rama shprehu mirënjohjen e tij për mbështetjen e shqiptarëve teksa shkroi: “duke ju rrëfyer se s’po i gjej dot fjalët për të shqiptuar sonte në 7 në Sheshin Skënderbej, ju falenderoj përgjunjësisht për besimin e patregueshëm”. Partia Socialiste, sipas të dhënave paraprake, ka siguruar 83 mandate, një rezultat që garanton shumicën për të qeverisur e vetme, ndërsa ende pritet përfundimi i numërimit të votave të Diasporës. Fitorja e socialistëve ka sjellë reagime dhe urime të shumta nga liderë ndërkombëtarë. Presidenti ukrainas Volodymyr Zelensky përgëzoi Ramën dhe shprehu mirënjohjen për qëndrimin e Shqipërisë ndaj konfliktit në Ukrainë. “Urime për fitoren bindëse. E vlerësojmë qëndrimin tuaj të qartë mbi nevojën për paqe të qëndrueshme në Ukrainë”, shkroi Zelenski në postimin e tij. Edhe kryeministri spanjoll Pedro Sanchez vlerësoi mbështetjen që shqiptarët i dhanë përpjekjeve për integrimin në BE:“Urime Edi Rama! Shqiptarët mbështesin fuqishëm rrugëtimin e vendit drejt Bashkimit Evropian.”