Kryeministri, Edi Rama së bashku me kryetaren e Bashkisë së Delvinës, Majlinda Qilimi ka vizituar ujësjellësin më të ri të kësaj bashkie. Kryetarja e Bashkisë të Delvinës ka theksuar se më herët furnizimi me ujë të pijëshëm realizohej në vetëm 5 deri 6 orë të ditës. Mungesa e ujit të pijëshëm, si dhe ndotja e tij në një rrjet totalisht të amortizuar kanë qenë të pranishme për dekada në këtë qytet. Ky investim ka realizuar 24 kilometra rrjet shpërndarës, së bashku me lidhjet e reja për familjet. Projekti mbulon nevojat e 10 mijë banorëve të qytetit të Delvinës me ujë të pijëshëm për 24 orë të ditës. Investimi për rinovimin e rrjetit të ujësjellësit ka bërë të mundur, që të mbulohet rreth 75 për qind e qytetit me ujë të pijëshëm, megjithatë problem vijon të mbetet zona periferike e Delvinës, e cila ende nuk ka filluar të furnizohet me ujë të pijëshëm në 24 orë të ditës. Kryeministri Rama theksoi se jo vetëm në Delvinë, por furnizimi me ujë 24 orë do të zgjidhet përfundimisht në të gjitha bashkitë e vendit, brenda vitit 2022. “Kjo ishte një torturë shumëdekadash që tashmë mori fund. Këtu dhe në shumë pika të tjera kemi 24 orë ujë, kemi rreth 120 kantiere në punë, drejt përfundimit ose në proces. Brenda 2022, do kemi ujë 24 orë për të gjitha zonat e banuara urbane dhe gjithë fshatrat me intensitet banimi. Do jetë një çështje plotësisht e mbyllur, nuk do jetë më temë debatesh dhe fushatash dhe kjo është një arritje domethënëse”