Pas ndryshimeve në strukturat drejtuese të Partisë Socialiste tashmë në fokusin e Ramës është kabineti qeveritar. Këtë të premte, ministrat udhëtuan drejt Tepelenës ku për dy ditë do të kenë një takim informal me kryeministrin Edi Rama. ‘Retreat-i’ i kabinetit qeveritar vjen një muaj para se të mblidhet kongresi i kësaj force politike. Në takimin 48 orësh, ministrat do të parashtrojnë perfomancën e deritanishme të dikastereve që drejtojnë si dhe angazhimet përkatëse në mandatin e tretë qeverisë së Partisë Socialiste. Bazuar në performancën e qeverisë, nuk përjashtohet mundësia që pas takimit dy ditor në Tepelenë të ketë edhe ndryshime në kabinet qeveritar. Pak orë para asamblesë kombëtare u lakuan disa emra ministrash të cilët mund të largohen nga detyra, por asgjë nuk u konfirmua nga vetë kryeministri Rama.