Shqipëria iu përgjigj pozitivisht ftesës së presidentit amerikan, Donald Trump për t’u ulur në tryezën e bordit të paqes për Gazës si anëtare themeluese. Kryeministri Edi Rama dërgoi një letër drejt Uashtingtonit ku shpreh vendosmërinë për të qëndruar krah Shteteve të Bashkuara të Amerikës, në të gjitha përpjekjet për promovimin e paqes, sigurisë dhe angazhimit konstruktiv global. Rama: “Është njëkohësisht privilegj dhe nder të shpreh gatishmërinë time të plotë për të kontribuar në këtë përpjekje të rëndësishme dhe për t’u bërë tërësisht pjesë e një angazhimi të përbashkët që synon ta përkthejë vizionin në veprim. Republika e Shqipërisë ka qenë prej kohësh një aleate e palëkundur e Shteteve të Bashkuara të Amerikës, e lidhur nga vlera të përbashkëta, respekt i ndërsjellë dhe një përkushtim i përbashkët ndaj lirisë, demokracisë dhe sigurisë ndërkombëtare.”