Një raketë e re ruse lundruese po shkakton shqetësim për NATO-n. Raketa Burevestnik ka një rreze veprimi deri në 5,500 kilometra dhe mund të mbajë koka të ndryshme luftarake, përfshirë ato bërthamore. Super-arma e re e Vladimir Putinit, Burevestnik, ose "Petrel", me sa duket është finalizuar. Raketa e aftë për të mbajtur armë bërthamore thuhet se është në gjendje të qëndrojë në ajër për orë të tëra, të shmangë sistemet mbrojtëse dhe të paraqesë një kërcënim potencialisht serioz. Ky vlerësim mbështetet, të paktën pjesërisht, nga analizat e inteligjencës perëndimore. Një Burevestnik plotësisht operacional do të ishte një problem i madh për Evropën. Nëse Rusia po e vendos vërtet sistemin në përdorim, NATO do të përballet me një rrezik të ri dhe shumë të vështirë për t'u kontrolluar. Sipas një dokumenti të klasifikuar të NATO-s: Super-arma konsiderohet veçanërisht shqetësuese. Dokumenti i referohet një rakete lundruese me energji bërthamore, "Burevestnik" ose "Petrel", e njohur nga NATO si SSC-X-9 Skyfall. Dokumenti vjen nga departamenti i inteligjencës së aleancës ushtarake, sipas gjermanes Die Ëelt. Ai shqyrton arsenalin e përditësuar të armëve bërthamore strategjike të Rusisë. Tre javë më parë, Presidenti rus Vladimir Putin njoftoi publikisht testet e suksesshme të raketës. Sipas dokumentit të NATO-s, raketa mund të arrijë shpejtësi mbi 900 kilometra në orë. Është shumë e manovrueshme, ka rreze të gjatë veprimi dhe mund të lëshohet nga platforma të lëvizshme. Kjo do t'i lejonte asaj të ndiqte rrugë të gjata dhe indirekte dhe të shmangte mbrojtjen ajrore të NATO-s. Sipas NATO-s, "sfidat ekzistuese do të përkeqësoheshin më tej nga rrezja dhe manovrueshmëria ekstreme" e raketës.