Presidenti ukrainas Volodymyr Zelenski tha se diskutoi për furnizimin me raketa dhe financimin e dronëve interceptues për të kundërshtuar sulmet ruse, në një telefonatë me Presidentin Francez Emmanuel Macron të premten. "Do të doja veçanërisht të theksoja marrëveshjen tonë për trajnimin e pilotëve për avionët Mirage. Franca është gati të trajnojë pilotë shtesë duke përdorur avionë shtesë", tha Zelenski në X, duke shtuar se udhëheqësit gjithashtu koordinuan hapat e ardhshëm politikë. Bisaeda e fundit midis Zelenskit dhe Macronit erdhi ndërsa Bashkimi Evropian ra dakord për një paketë të 18-të sanksionesh kundër Rusisë për shkak të luftës në Ukrainë, që përfshin masa që synojnë të shkaktojnë goditje të mëtejshme mbi industrinë ruse të naftës dhe energjisë. Macron tha se paketa e re e sanksioneve ishte e pashembullt. "Është e nevojshme më shumë se kurrë më parë t’i kujtojmë vetes se siguria, liria dhe e ardhmja e Evropës janë të lidhura ngushtë me fatin e Ukrainës", shkroi Macron në X. "Në këtë drejtim, unë mirëpres miratimin këtë mëngjes nga Bashkimi Evropian të një pakete të re të pashembullt sanksionesh kundër Rusisë. Sulmet ruse duhet të ndalen menjëherë", shtoi ai.