Duke nisur nga e marta, datë 2 dhjetor rafineria e Industrisë së Naftës së Serbisë në Pançevë nuk do të funksionojë më dhe Serbia do të duhet të gjejë mënyra të tjera për të menaxhuar situatën. Ishte kjo deklarata që bëri presidenti serb Aleksandër Vuçic, i cili i bëri thirrje qytetarëve që të jenë të qetë, pasi sipas tij shteti do të ketë zgjidhje të tjera. Ai shtoi se nuk pret që të marrë licencë nga SHBA-ja dhe se rafineria duhet të mbyllet të martën. Gjithashtu, shtoi se të hënën ka një takim të rëndësishëm në të cilin duhet të adresohen këto probleme. Vuçiq tha për TV Informer se nuk e kupton logjikën dhe taktikën e SHBA-së lidhur me NIS-in, as pse kësaj kompanie nuk i zgjatet leja e punës, megjithëse shteti serb ka dhënë garanci se deri në afatin e vendosur nga SHBA-ja do të ndryshohet pronësia në atë kompani, e cila është nën sanksionet amerikane për shkak të pronësisë ruse.