Flutura Açka ka njoftuar kryetaren e Kuvendit, Lindita Nikolla për vendimin e saj të dyfishtë për t’u larguar si nga grupi parlamentar i Partisë Demokratike, ashtu edhe nga posti i kryetares së komisionit parlamentar të arsimit dhe medias. Përmes një postimi në rrjetet sociale, deputetja e dalë nga listat e Partisë Demokratike e shpjegon vendimin e saj me zhvillimet e fundit politike dhe dakordësinë mes PD-së dhe PS-së për Kodin Zgjedhor. Sipas Açkës, dakordësia për ndryshimet në këtë kod rrëzuan maskën e fundit. “Nga dje ra dhe maska e fundit, tani ju ka mbetur edhe akti i fundit, Komisioni AntiSPAK. Por unë nuk dua të bëj sehir minën ndaj demokracisë, ndaj largohem nga Grupi i PD”, shkruan ajo. Deputetja citon përplasjen me Gazment Bardhin dhe Flamur Nokën në janar të këtij viti në komisionin e Medias, si pikënisje të sulmeve ndaj saj nga elementë të opozitës. “Nga ajo kohë, sulmet e fshehta dhe të hapura ndaj personit tim nuk kanë reshtur, me të gjitha format dhe mjetet dhe shkakun e vetëm: qasjet e ndryshme të sjelljes politike opozitare”, shkruan Açka në letrën e dorëzuar për Nikollën.