Ambasadorët e vendeve të QUINT-it kanë kërkuar që Kosova të pezullojë zbatimin e rregullores së Bankës Qendrore të Kosovës, që parashikon se monedha e vetme në Kosovë për pagesa të jetë euro. Përmes një deklarate të përbashkët, ambasadorët e QUINT-it thanë se pezullimi i vendimit duhet të bëhet për të “mundësuar një periudhë të mjaftueshme tranzicioni dhe për komunikim të qartë dhe efektiv publik"."Çështja duhet të diskutohet më tej në kuadër të dialogut të ndërmjetësuar nga Bashkimi Evropian”, u tha në deklaratë. Ambasadorët e QUINT-it thanë se rregullorja e Bankës Qendrore të Kosovës për operacionet me para kesh, që pritet të hyjë në fuqi më 1 shkurt, synon të reduktojë paratë e falsifikuara dhe të ruajë stabilitetin financiar, por po ashtu “ngre shqetësime në lidhje me ndikimin në veçanti të komunitetet me shumicë serbe”. “Ne jemi të shqetësuar për ndikimin e rregullores në veçanti në shkollat dhe spitalet, për të cilat asnjë proces alternativ nuk duket i zbatueshëm për momentin. Rregullorja gjithashtu do të ketë ndikim të drejtpërdrejtë në jetën e përditshme të shumicës dërrmuese të serbëve të Kosovës që marrin pagesa dhe ndihma financiare nga Serbia”, u tha në deklaratën e ambasadorëve të QUINT-it. Në QUINT bëjnë pjesë Shtetet e Bashkuara, Franca, Gjermania, Italia dhe Britania. Përfaqësuesit e këtyre shteteve u takuan më herët edhe me kryeministrin e Kosovës, Albin Kurti, për të diskutuar për këtë çështje.