Presidenti rus Vladimir Putin thirri një takim të Këshillit të Sigurisë të Rusisë pas një telefonate me Presidentin amerikan Donald Trump, raportuan të premten agjencitë ruse të lajmeve, duke cituar ndihmësin e Kremlinit Yuri Ushakov. Sipas Ushakov, Putin u dha një informim të detajuar anëtarëve të Këshillit të Sigurisë në lidhje me bisedën me Trump. Trump dhe Putin ranë dakord të enjten për një takim tjetër mbi luftën në Ukrainë, një veprim i papritur që erdhi ndërsa Moska ishte në ethe përballë mundësisë së furnizimit të ukrainës me raketa Tomahaëk nga SHBA. Në Rusinë e Putinit, Këshilli i Sigurisë është një arenë kyçe për formulimin e vendimeve mbi çështjet më të rëndësishme të sigurisë kombëtare të Rusisë. Takimi i radhës për të cilin Trump njoftoi shtypin, do të mbahet sipas tij në Hungari dhe kryeministri hungarez Viktor Orban ka nisur menjëherë punën për organizimin e tij. Ai tha se do të fliste me Presidentin rus Vladimir Putin të premten për të diskutuar detajet për takimin në Budapest. Orban është aleati më i ngushtë i Trump dhe Putin në Bashkimin Evropian dhe një kritik i vendosur i mbështetjes perëndimore për Kievin. "Do të flas me Presidentin Putin gjatë ditës", tha Orban për radion shtetërore të premten. Udhëheqësi nacionalist tha se Budapesti është "vendi i vetëm në Evropë sot ku mund të mbahet një takim i tillë" për shkak të asaj që ai e përshkroi si qëndrimi "konsistent" i Hungarisë për paqen. Zgjedhja e Budapestit anashkalon gjithashtu një urdhër arresti të Gjykatës Ndërkombëtare Penale për Putinin për krime të dyshuara lufte. Hungaria ka njoftuar tërheqjen e saj nga GJPN-ja, por teorikisht është ende anëtare deri në qershor 2026. Organizimi i një samiti Trump-Putin nga Orban po ngjall frikë në BE ndërkohë, pasi ai rregullisht prish unitetin e bllokut duke refuzuar të dërgojë armë në Ukrainë, duke penguar përpjekjen e Kievit për anëtarësim në BE dhe duke penguar sanksione më të ashpra ndaj Rusisë.