Presidenti rus Vladimir Putin i ka dhuruar Koresë së Veriut dhjetëra kafshë, duke përfshirë një luan dhe dy arinj, si shenjë miqësie mes Moskës dhe Phenianit, thanë zyrtarët rusë të mërkurën. Të dy vendet kanë thelluar lidhjet politike, ushtarake dhe kulturore në mesin e ofensivës së Rusisë ndaj Ukrainës, me Putinin dhe udhëheqësin e Koresë së Veriut, Kim Jong Un, që pohojnë vazhdimisht miqësinë e tyre personale. “Një luan afrikan, dy arinj kaf, 25 fazanë të llojeve të ndryshme, 40 rosa dhe kafshë të tjera, u transferuan nga kopshti zoologjik i Moskës në kopshtin zoologjik të Phenianit”, tha ministria e burimeve natyrore të Rusisë në një postim në Telegram. Ministria postoi një video të kafshëve, që zbriteshin nga një avion qeveritar si edhe imazhet e një luani në kopshtin zoologjik të penianit. Putini më herët i kishte dhuruar Kim Jong Unit 24 kuaj të racës së pastër, të njohur si të preferuarit e liderit koreanoverior, ndërsa ky i fundit i dërgoi Putinit dy qen të një race vendase. Të dy vendet, nën sanksione të rënda perëndimore, nënshkruan një pakt të mbrojtjes së ndërsjellë në fillim të këtij viti që i detyron ata të ofrojnë ndihmë të menjëhershme ushtarake nëse vendi tjetër pushtohet. Kryeqytetet perëndimore, si dhe Ukraina dhe Koreja e Jugut, thonë se Koreja e Veriut ka vendosur së fundmi më shumë se 10,000 trupa të saj në Rusi, për t'u angazhuar në luftime kundër forcave të Kievit.