Mëngjesin e së martës mbërriti në portin e Durrësit kroçera “Nautica” me turistë amerikanë në bord. Ndonëse këtë vit numri i kroçerave që ankorohen në Durrës ka rënë ndjeshëm, kjo anije gjigante e ka përfshirë Shqipërinë në turin e saj të pjesshëm në Mesdhe. Me të mbërritur në port, të organizuar turistët vizituan qendrat muzeale, arkeologjike dhe historike në qytetet e Durrësit, Tiranës dhe Krujës. Nga qendra e informacionit në Autoritetin Portual mësohet se kroçera që ka lundruar, gjatë natës së kaluar, nga porti grek i Sirios drejt Durrësit, po kryen një tur lundrimi në 9 porte të Adriatikut dhe Jonit, kryesisht në Itali, si dhe në tre porte të Greqisë, Kroacisë dhe Shqipërisë. Anija me gjatësi 180 metra dhe flamur të ishujve Marshall më pas do të lundrojë drejt Dubrovnikut të Kroacisë.