Qindra njerëz zhvilluan protesta të zhurmshme në Madrid dhe qytete të tjera spanjolle, duke u bërë thirrje deputetëve të miratojnë masa për të trajtuar krizën e strehimit në një votim parlamentar të premten. Demonstruesit godisnin tenxheret me lugë, u frynin bilbilëve dhe lëshonin slogane në mbështetje të masave para bashkisë së Madridit. Paketa e masave që do të hidhet në votim parlamentar erdhi pasi një pensioniste nga Madridi, 87-vjeçarja Maricarmen Abascal, u dëbua nga apartamenti ku kishte jetuar për 70 vjet, gjë që shkaktoi zemërim dhe demonstrata në mbarë vendin. Këshilli bashkiak i Madridit kontrollohet nga Partia Popullore konservatore, e cila është zotuar të votojë kundër paketës. "Është koha për të dëgjuar njerëzit në rrugë dhe për të ndaluar bërjen e llogarive partiake," u tha gazetarëve Alicia del Rio, zëdhënëse e Sindikatës së Qiramarrësve të Madridit. Protesta të ngjashme u mbajtën para bashkive në qytete të tjera, përfshirë Barcelonën dhe Kordobën. Parlamenti pritet të votojë një paketë masash të miratuara të martën nga qeveria e kryeministrit spanjoll Pedro Sanchez, pas protestave mbarëkombëtare të shkaktuara nga dëbimi i Abascal-it. Ato përfshijnë kufizime më të rrepta për dëbimin e qiramarrësve që konsiderohen të cenueshëm dhe ndalimin e kompanive me qëllime "spekulative" në tregun e pasurive të paluajtshme deri në fund të vitit 2028. Por koalicioni i udhëhequr nga socialistët e Sanchez-it përballet me detyrën e vështirë për të bindur mjaftueshëm parti në një parlament tejet të fragmentuar që të miratojnë dekretet.