Data 18 Maj ishte përcaktuar si dita kur komisioni hetimor parlamentar do të zhvillonte një seancë dëgjimore me kreun e shtetit, Ilir Meta. Ky i fundit do të kishte mundësinë të shpjegonte aktet e tij, të cilat janë vlerësuar si antikushtetuese nga deputetët e grupit parlamentar të Partisë Socialiste. Meta e shoqëroi refuzimin e ftesës së anëtarëve të komisionit hetimor, me një përgjigje përmes një letre të gjatë prej 29 faqesh, drejtuar kryetarit të kuvendit, Gramoz Ruçi. Në thelb të letrës së Metës drejtuar Ruçit qëndrojnë pretendimet e Metës për një proces antikushtetues dhe fiktiv të këtij komisioni. Kreu i shtetit ka theksuar disa herë përgjatë letrës, se pavarësisht veprimeve hetimore ndaj tij, ai do të vijojë të jetë president i republikës deri në datën 24 korrik të vitit 2022, moment kur i mbaron mandatin presidencial. Që në krye të herës, vlen të theksohet se, kjo kërkesë, në përmbajtje të saj, nuk referon asnjë dispozitë kushtetuese dhe ligjore për bazueshmërinë e saj. E gjithë kjo veprimtari u krye, dhe po vazhdon të konsumohet nga Kuvendi për të vetmin qëllim - atë të shmangies së vëmendjes nga parregullsitë dhe krimet zgjedhore që partia në pushtet ka nxitur apo ka urdhëruar në procesin zgjedhor të 25 prillit 2021, dhe me tendencën për të paralizuar veprimtarinë kushtetuese të Institucionit të Presidentit të Republikës, ashtu sikundër nga ana tjetër duke synuar intimidimin e institucioneve të tjera ligjzbatuese dhe ushtrimin e presionit publik ndaj tyre, për të moszbardhur e hetuar krimet zgjedhore që janë konsumuar me tepri dhe pa asnjë kufizim nga kjo shumicë qeverisëse gjatë këtij procesi zgjedhor. Kjo nuk është hera e parë që presidenti Meta i shmanget ballafaqimit me deputetët të cilët kanë ngritur pretendime antikushtetuese ndaj tij. Kujtojmë se Meta refuzoi edhe ftesën e datës 6 maj të komisionit për Çështjet Ligjore duke u justifikuar me prioritetet e axhendës presidenciale.