Policia e Krujës ka arritur të vërë në pranga një 34-vjeçar të shpallur prej 2 vitesh në kërkim për kultivim të lëndëve narkotike. I arrestuari është Artur Tema, të cilit në vitin 2021 I janë kapur 280 rrënjë kanabis në dy sera në fshatin Larushk, ndërsa në banesën e tij gjatë kontrollit I janë gjetur edhe 5 kilogramë kanabis të tjera. Specialistët për Hetimin e Krimeve të Komisariatit të Policisë Krujë, bazuar dhe në informacionet e siguruara përmes inteligjencës informative, në kuadër të operacionit policor të koduar “Kultivuesi”, kanë kapur dhe ndaluar shtetasin e shpallur në kërkim Artur Tema, 34 vjeç, banues në fshatin Larushk tw Fushë Krujës. Gjykata e Shkallës së Parë Krujë i ka caktuar këtij shtetasi, masën e sigurisë "Arrest në burg" për veprat penale "Kultivimi i bimëve narkotike" dhe "Prodhimi dhe shitja e narkotikeve", të kryera në bashkëpunim. Gjatë një operacioni të zhvilluar në qershor të vitit 2021, për kontrollin e territorit, me qëllim parandalimin e kultivimit të bimëve narkotike, në afërsi të banesës së tij, në Larushk, janë gjetur të kultivuara në dy sera, 280 bimë narkotike cannabis sativa, të cilat dyshohet se 34-vjeçari i kishte kultivuar në bashkëpunim me babanë e tij. Hetimet e mëtejshme për rastin po vijojnë nga prokuroria e Krujës.