Deri më tani, votimi elektronik është vendosur i sigurt që do të zbatohet në Bashkinë e Vorës. Por, palët kanë rënë parimisht dakord që teknologjia të përdoret edhe në të paktën dy bashki të tjera, ku njëra të jetë bashki e madhe dhe tjetra bashki më e vogël. Komisioni Qendror i Zgjedhjeve u ka kërkuar partive politike që të gjejnë dakordësinë se cilat do të jenë dy bashkitë e tjera ku do të aplikohet teknologjia, veç asaj të Vorës, të vulosur tashmë. Burime të Top News pohojnë se Partia Demokratike ka këmbëngulur që njëra të jetë bashkia e Durrësit dhe tjetra ajo e Kavajës. Socialistët nga ana tjetër kanë propozuar Fierin dhe Rrogozhinën. Në mes janë llogaritë e imta elektorale dhe dakordësia nuk është gjetur për asnjërën nga katër bashkitë e përfolura në propozimet fillestare. Në vend të kësaj është gjetur një rrugë e tretë; Elbasani dhe Kamza.