Rreth 50,000 infermierë mund të largohen nga Mbretëria e Bashkuar për shkak të propozimeve të qeverisë për imigracionin, duke e zhytur vendin në krizën më të madhe të fuqisë punëtore ndonjëherë, sipas një ankete të realizuar, shkruan The Guardian. Masat, përfshijnë gjithashtu plane për të rritur kërkesat e aftësive të punëtorëve të huaj në nivelin e diplomës dhe për të rritur standardet e gjuhës angleze të kërkuara për të gjitha llojet e vizave. Gjithashtu kryeministri britanik, është zotuar të frenojë migrimin neto, me plane për t'i detyruar migrantët të presin deri në 10 vjet për të aplikuar për t'u vendosur në Mbretërinë e Bashkuar, në vend që të fitojnë automatikisht statusin e të vendosurit pas pesë vjetësh. Sipas anketës, ndryshimet e propozuara nga qeveria për lejen e qëndrimit të pacaktuar kanë shkaktuar alarm, dhe me shumë njerëz tani po mendojnë të largohen nga Mbretëria e Bashkuar përgjithmonë. Sipas shifrave qeveritare, mbi 76 mijë persona kanë marrë vizë që nga viti 2021 dhe aktualisht do të kishin të drejtën për statusin e të vendosurit pas pesë vitesh në Britani, por propozimet për ta dyfishuar këtë periudhë në një dekadë e kanë vënë në rrezik të ardhmen e tyre.