Sulmi i armatosur në Banjskë të Zveçanit solli edhe më shumë forca speciale të policisë së Kosovës në pjesën veriore të vendit. Vetëm dy muaj e gjysmë më parë, Qeveria e Kosovës kishte rënë dakord të zvogëlonte praninë e saj në zonën e banuar me shumicë serbe. Kjo ishte pjesë e një marrëveshjeje me Bashkimin Evropian për uljen e tensioneve. Situata atje u acarua në fund të majit, kur kryetarët shqiptarë të komunave, nën shoqërimin e policisë speciale, u vendosën në objektet komunale. Veprimi nxiti reagimin, herë-herë edhe të dhunshëm, të popullatës lokale, që kundërshton si kryetarët shqiptarë, ashtu edhe praninë e forcave speciale të policisë së Kosovës. Pas trysnisë disajavëshe të BE-së, Qeveria e Kosovës u dakordua ta zvogëlojë përgjysmë praninë e njësisë speciale përreth objekteve komunale në veri, si dhe të organizojë zgjedhje të reja atje. Por, sulmi në Banjskë, ku grupe të armatosura qëlluan policinë e Kosovës duke vrarë një pjesëtar të saj më 24 shtator, iu dha drejtim tjetër zhvillimeve.