Policia e Kosovës tha të enjten se ka sekuestruar armatime që u gjetën pranë një flamuri të Serbisë, gjatë një patrullimi në fshatin Banjskë të Zveçanit, në pjesën veriore të vendit. Në raportin e saj të fundit për zhvillimet e 24 orëve të shkuara, Policia tha se, gjatë patrullimit më 4 janar, "ka gjetur dhe sekuestruar një flamur të shtetit të Serbisë, 34-gëzhoja, një karikator kallashnikovi dhe 689-fishekë kalibrash të ndryshëm”. Policia e ka cilësuar rastin si “armëmbajtje pa leje”. Sipas Policisë, deri tani nuk ka persona të arrestuar lidhur me këtë rast, ndërsa hetimet janë duke vazhduar. Më 24 shtator të vitit të kaluar, një grup serbësh i armatosur sulmoi Policinë e Kosovës në Banjskë, në veri të Kosovës, dhe vrau rreshterin Afrim Bunjaku. Më pas, në shkëmbimin e zjarrit mbetën të vrarë tre sulmues serbë. Përgjegjësinë për sulmin e ka marrë Millan Radoiçiç, ish-nënkryetar i Listës Serbe, partisë kryesore të serbëve në Kosovë që gëzon mbështetjen e Serbisë, duke pohuar se ai “personalisht” e ka organizuar sulmin dhe të gjitha përgatitjet logjistike, dhe se nuk ka informuar askënd për ato plane. Kosova akuzon Serbinë se qëndron pas sulmit, gjë që Beogradi zyrtar e mohon.