Policia e Kosovës ka kryer kontrolle në pesë adresa në tre komunat në veri të Kosovës, lidhur me sulmet ndaj Policisë së Kosovës, më 24 shtator, në Banjskë të Zveçanit. Zëvendëskomandanti i Policisë së Kosovës për rajonin e Veriut, Veton Elshani tha se kontrollet në këto pika kanë nisur pas orës 06:00 dhe lidhen me zhvillimet në Banjskë. Operacioni ka përfunduar rreth orës 7:30. Elshani tha se nuk ka persona të arrestuar, por që kontrollet janë kryer në disa vende specifike. Sipas informacioneve në teren, pjesëtarët e policisë në Mitrovicën e Veriut kanë qenë te spitali i qytetit. Aty, hetuesit kanë kërkuar që të kontrollohet një aneks ku gjendet sistemi ngrohës. Drejtori i spitalit, Zllatan Ellek ka konfirmuar për mediat se policia ka konfiskuar filmimet monitoruese dhe nuk ka gjetur asgjë tjetër të dyshimtë. Zyrtarët e policisë kanë qenë edhe në një restorant në Mitrovicën e Veriut, i cili besohet se është në pronësi të Ema Radoiçiç, bashkëshortes së nënkryetarit të Listës Serbe, Millan Radoiçiç. Policia tha se kontrollet i ka kryer në koordinim me misionin e Bashkimit Evropian për sundim të ligjit, EULEX dhe misionin e NATO-s në Kosovë, KFOR. Millan Radoiçiç është akuzuar nga autoritetet e Kosovës se ka organizuar dhe ka qenë pjesë e sulmeve ndaj Policisë në Banjskë. Ministri i Brendshëm i Kosovës, Xhelal Sveçla ka publikuar një pamje me dron, duke thënë se njëri prej personave, që shihet i veshur me uniformë me armë në dorë, ka qenë vetë Radoiçiç. Kuvendi i Kosovës miratoi një ditë më parë një rezolutë, e cila dënon sulmin në Banjskë dhe përmend nevojën e një hetimi ndërkombëtar për Serbinë dhe rolin e saj në këtë sulm. Presidenti serb, Aleksandar Vuçiç ka thënë në anën tjetër se sulmuesit kanë qenë serbë të Kosovës, të lodhur nga “terrori” i Kurtit, dhe ka mohuar përfshirjen e shtetit të tij në këtë sulm.