Planifikuesit ushtarakë të SHBA-së dhe Evropës kanë filluar të vlerësojnë garancitë e sigurisë pas konfliktit për Ukrainën, thanë zyrtarë dhe burime amerikane për agjencinë e lajmeve Reuters, pas premtimit të Presidentit Donald Trump për të ndihmuar në mbrojtjen e vendit sipas çdo marrëveshjeje për t'i dhënë fund luftës së Rusisë. Ukraina dhe aleatët e saj evropianë janë inkurajuar nga premtimi i Trumpit gjatë një samiti të hënën për garancitë e sigurisë për Kievin, por shumë pyetje mbeten pa përgjigje. Zyrtarët i thanë Reuters se Pentagoni po kryen planifikime mbi mbështetjen që Uashingtoni mund të ofrojë përtej furnizimit me armë. Por ata paralajmëruan se do të duhej kohë që planifikuesit e SHBA-së dhe Evropës të përcaktonin se çfarë do të ishte ushtarakisht e realizueshme dhe e pranueshme për Kremlinin. Një opsion është dërgimi i forcave evropiane në Ukrainë, por vendosja e SHBA-së në krye të komandës dhe kontrollit të tyre, thanë për Reuters dy burime të njohura me çështjen. Burimet shtuan se trupat nuk do të ishin nën një flamur të NATO-s, por do të vepronin nën flamujt e kombeve të tyre.