Kryeministri grek Qriako Mitsotaqis njoftoi të martën planet për të vizituar Ankaranë në maj, e ky shihet gjerësisht si hapi më i fundit drejt një shkrirjeje diplomatike mes dy rivalëve historikë, që përfshiu edhe një vizitë të presidentit turk Recep Tajip Erdogan në Greqi, në dhjetor. "Unë mendoj se ka vullnet të sinqertë edhe nga ana e udhëheqjes turke që ne të jemi në gjendje të kapërcejmë dallimet tona, për të shmangur të paktën tensionet," tha Mitsotakis në një intervistë për mediat greke. Greqia dhe Turqia, të dyja anëtarët e NATO-s, janë përplasur prej kohësh për çështje të ndryshme, duke përfshirë këtu fillimin dhe përfundimin e shelfeve të tyre kontinentale, burimet e energjisë, fluturimet mbi detin Egje dhe politikën ndaj ishullit të ndarë të Qipros. Vendet sidoqoftë kanë ndërmarrë hapa të profilit të lartë për të përmirësuar lidhjet mes tyre në vitet e fundit, veçanërisht që kur Rusia pushtoi Ukrainën në 2022. Gjatë vizitës së Erdoganit në Greqi tre muaj më parë, liderët ranë dakord të forcojnë tregtinë, të mbajnë kanalet e komunikimit të hapura, të marrin masa besim-ndërtuese ushtarake për të ulur tensionet dhe të punojnë për çështjet që i kanë mbajtur të ndarë, veçanërisht në detin Egje.