Punonjësit e emergjencave janë përpjekur të pastrojnë rrugët e zhytura nën ujë ndërsa njerëzit nisën të vlerësonin dëmet në shtëpi e biznese të enjten pasi një stuhi e rrallë dhe epike, përmbyti Emiratet e Bashkuara Arabe. Aeroporti Ndërkombëtar i Dubait, një qendër e madhe dhe e rëndësishme udhëtimi, u përpoq të sistemonte një numër të madh të fluturimesh ndërkohë që shumë pista ishin ende të përmbytura. Shirat ishin më të fortat të regjistruara nga shteti i Gjirit në 75 vitet që nga fillimi i regjistrimit të të dhënave. Ato bënë që një pjesë e madhe e vendit të bllokohej dhe shkaktuan dëme kolosale. Stuhia e paprecedenttë goditi edhe vende të tjera të rajonit, mes të cilëve edhe omani, që ka regjistruar madje edhe 20 viktima si pasojë e motit të keq. Reshjet janë të rralla në Emiratet e Bashkuara Arabe dhe në zonat e tjera në Gadishullin Arabik, që zakonisht njihet për klimën e thatë të shkretëtirës. Temperaturat e ajrit gjatë verës mund të arrijnë në mbi 50 gradë Celsius. Pas ngjarjeve të së martës, u ngritën shumë pikëpyetje nëse mbjellja e reve, një proces që Emiratet e Bashkuara Arabe e bëjnë shpesh, mund të kishte shkaktuar shirat e dendur. Por ekspertët e klimës thanë se ngrohja globale ishte fajtori kryesor pas ngjarjeve ekstreme të motit. Studiuesit parashikojnë se ndryshimi i klimës do të çojë në temperatura të larta, rritje të lagështisë dhe një rrezik më të madh të përmbytjeve në pjesë të rajonit të Gjirit. Problemi mund të përkeqësohet në vende si Emiratet e Bashkuara Arabe ku ka mungesë të infrastrukturës së kullimit për të përballuar shirat e dendur. Një agjenci qeveritare e Emirateve të Bashkuara Arabe që mbikëqyr mbjelljen e reve, një proces i manipulimit të reve për të rritur reshjet, mohoi që ndonjë operacion i tillë të ishte kryer përpara stuhisë.